ਰੇਵਾੜੀ: ਆਪਣੀ ਫ਼ਸਲ ਲੈ ਕੇ ਬਾਵਲ ਦੀ ਅਨਾਜ ਮੰਡੀ ਵਿੱਚ ਪੁੱਜੇ ਇੱਕ ਕਿਸਾਨ ਨੂੰ ਤੇਜ਼ ਗਰਮੀ ਦੌਰਾਨ ਦੌਰਾ ਪੈਣ ਨਾਲ ਹਾਲਤ ਵਿਗੜ ਗਈ ਅਤੇ ਉਹ ਜ਼ਮੀਨ ‘ਤੇ ਡਿੱਗ ਪਿਆ। ਉਸ ਸਮੇਂ ਮੰਡੀ ਦਾ ਦੌਰਾ ਕਰਨ ਆਏ ਸਹਿਕਾਰਤਾ ਮੰਤਰੀ ਡਾ: ਬਨਵਾਰੀ ਲਾਲ (Cooperation Minister Dr. Banwari Lal) ਨੇ ਤੁਰੰਤ ਡਾਕਟਰ ਬਣ ਕੇ ਉਸਦੀ ਜਾਂਚ ਕੀਤੀ ਅਤੇ ਟੀਕੇ ਅਤੇ ਦਵਾਈਆਂ ਦਿੱਤੀਆਂ । ਇਸ ਤੋਂ ਬਾਅਦ ਜਦੋਂ ਕਿਸਾਨ ਦੀ ਸਿਹਤ ਠੀਕ ਹੋ ਗਈ ਤਾਂ ਉੱਥੇ ਮੌਜੂਦ ਸਾਰੇ ਕਿਸਾਨਾਂ ਨੇ ਮੰਤਰੀ ਦੀ ਤਾਰੀਫ਼ ਕਰਨੀ ਸ਼ੁਰੂ ਕਰ ਦਿੱਤੀ।
ਹੋਇਆ ਇਹ ਕਿ ਸਹਿਕਾਰਤਾ ਮੰਤਰੀ ਡਾ: ਬਨਵਾਰੀ ਲਾਲ ਬੀਤੇ ਦਿਨ ਬਾਵਲ ਦੀ ਅਨਾਜ ਮੰਡੀ ਦੇ ਪ੍ਰਬੰਧਾਂ ਦਾ ਅਚਨਚੇਤ ਨਿਰੀਖਣ ਕਰਨ ਗਏ ਸਨ | ਉਨ੍ਹਾਂ ਸਰ੍ਹੋਂ ਦੀ ਖਰੀਦ, ਮਾਪ ਅਤੇ ਗੁਣਵੱਤਾ ਦਾ ਜਾਇਜ਼ਾ ਲਿਆ। ਇਸ ਦੇ ਨਾਲ ਹੀ ਅਧਿਕਾਰੀਆਂ ਨੂੰ ਹਦਾਇਤ ਕੀਤੀ ਗਈ ਕਿ ਮੰਡੀ ਵਿੱਚ ਫ਼ਸਲ ਦੀ ਆਮਦ ਸਮੇਂ ਕਿਸਾਨਾਂ ਨੂੰ ਕਿਸੇ ਕਿਸਮ ਦੀ ਦਿੱਕਤ ਦਾ ਸਾਹਮਣਾ ਨਾ ਕਰਨਾ ਪਵੇ ਅਤੇ ਪੀਣ ਵਾਲੇ ਪਾਣੀ ਅਤੇ ਆਰਾਮ ਕਰਨ ਵਰਗੀਆਂ ਸਾਰੀਆਂ ਲੋੜੀਂਦੀਆਂ ਸਹੂਲਤਾਂ ਨੂੰ ਯਕੀਨੀ ਬਣਾਇਆ ਜਾਵੇ।
ਜਦੋਂ ਉਹ ਮੰਡੀ ਦਾ ਜਾਇਜ਼ਾ ਲੈ ਰਹੇ ਸਨ ਤਾਂ ਬਾਵਲ ਦੇ ਕਿਸਾਨ ਵੀਰ ਬਹਾਦਰ ਦੀ ਅਚਾਨਕ ਤਬੀਅਤ ਖਰਾਬ ਹੋ ਗਈ ਅਤੇ ਉਹ ਜ਼ਮੀਨ ‘ਤੇ ਡਿੱਗ ਪਿਆ। ਬਨਵਾਰੀ ਲਾਲ ਨੇ ਤੁਰੰਤ ਉਸਦੀ ਨਬਜ਼ ਲੱਭੀ ਅਤੇ ਜਾਂਚ ਕੀਤੀ। ਉਸ ਤੋਂ ਬਾਅਦ ਉਸ ਲਈ ਟੀਕੇ ਅਤੇ ਦਵਾਈਆਂ ਦਾ ਪ੍ਰਬੰਧ ਕੀਤਾ ਗਿਆ। ਜਦੋਂ ਕਿਸਾਨ ਠੀਕ ਹੋ ਗਿਆ ਤਾਂ ਮੰਤਰੀ ਨੇ ਉਸ ਦਾ ਹਾਲ-ਚਾਲ ਪੁੱਛਿਆ ਅਤੇ ਗਰਮੀਆਂ ਵਿੱਚ ਆਪਣਾ ਖਿਆਲ ਰੱਖਣ ਦੀ ਸਲਾਹ ਦਿੱਤੀ।
ਬਨਵਾਰੀ ਲਾਲ ਨੇ ਕਿਹਾ ਕਿ ਉਹ ਭਾਵੇਂ ਨੇਤਾ ਅਤੇ ਮੰਤਰੀ ਬਣ ਗਏ ਹਨ ਪਰ ਪ੍ਰੈਕਟਿਸ ਹਾਲੇ ਵੀ ਨਹੀਂ ਭੁਲੀ ਹੈ ।ਉਹ ਆਪਣੇ ਨਿਵਾਸ ‘ਤੇ ਕਦੇ-ਕਦੇ ਜਰੂਰਤ ਪੈਣ ‘ਤੇ ਲੋਕਾਂ ਦੇ ਸਵਾਸਥ ਦੀ ਜਾਂਚ ਕਰਦੇ ਹਨ। ਤੁਹਾਨੂੰ ਦੱਸ ਦੇਈਏ ਕਿ ਡਾਕਟਰ ਬਨਵਾਰੀ ਲਾਲ ਨੇ MBBS ਕੀਤਾ ਹੈ ਅਤੇ ਰਾਜਨੀਤੀ ਵਿੱਚ ਆਉਣ ਤੋਂ ਪਹਿਲਾਂ ਉਹ ਵਨਾਲ ਸਥਿਤ ਆਪਣੇ ਕਲੀਨਿਕ ਵਿੱਚ ਪ੍ਰੈਕਟਿਸ ਕਰਦੇ ਸਨ। ਇਸ ਦਾ ਲਾਭ ਕਿਸਾਨ ਨੂੰ ਮਿਲਿਆ।