ਲੁਧਿਆਣਾ : ਸੈਂਟਰਲ ਬੋਰਡ ਆਫ ਸੈਕੰਡਰੀ ਐਜੂਕੇਸ਼ਨ (Central Board of Secondary Education)(ਸੀ.ਬੀ.ਐੱਸ.ਈ.) ਦੀ 15 ਫਰਵਰੀ ਤੋਂ ਸ਼ੁਰੂ ਹੋ ਰਹੀ 10ਵੀਂ ਅਤੇ 12ਵੀਂ ਦੀ ਪ੍ਰੀਖਿਆ ‘ਚ ਬੈਠਣ ਵਾਲੇ ਸ਼ੂਗਰ ਦੇ ਮਰੀਜ਼ਾਂ ਲਈ ਰਾਹਤ ਦੀ ਖ਼ਬਰ ਹੈ।
ਅਸਲ ਵਿੱਚ ਸੀ.ਬੀ.ਐਸ.ਈ. ਨੇ ਇੱਕ ਨੋਟੀਫਿਕੇਸ਼ਨ ਜਾਰੀ ਕੀਤਾ ਹੈ ਜਿਸ ਵਿੱਚ ਟਾਈਪ 1 ਸ਼ੂਗਰ ਵਾਲੇ ਵਿਦਿਆਰਥੀਆਂ ਨੂੰ ਸ਼ੂਗਰ ਦੀਆਂ ਗੋਲੀਆਂ, ਚਾਕਲੇਟਾਂ, ਕੈਂਡੀਜ਼ ਅਤੇ ਫਲਾਂ ਨੂੰ ਪ੍ਰੀਖਿਆ ਹਾਲ ਵਿੱਚ ਲਿਜਾਣ ਦੀ ਇਜਾਜ਼ਤ ਦਿੱਤੀ ਗਈ ਹੈ। ਇੰਨਾ ਹੀ ਨਹੀਂ, ਅਜਿਹੇ ਵਿਦਿਆਰਥੀ ਆਪਣੇ ਨਾਲ ਇਮਤਿਹਾਨ ਹਾਲ ਵਿਚ ਗਲੂਕੋਮੀਟਰ, ਸ਼ੂਗਰ ਦੀਆਂ ਪੱਟੀਆਂ ਜਾਂ ਕੋਈ ਹੋਰ ਮੈਡੀਕਲ ਵਸਤੂ ਲੈ ਸਕਦੇ ਹਨ ਜਿਸ ਦੀ ਉਨ੍ਹਾਂ ਨੂੰ ਸ਼ੂਗਰ ਦੇ ਪ੍ਰਬੰਧਨ ਜਾਂ ਨਿਗਰਾਨੀ ਲਈ ਲੋੜ ਹੁੰਦੀ ਹੈ। ਜਾਣਕਾਰੀ ਅਨੁਸਾਰ ਸੀ.ਬੀ.ਐਸ.ਈ. ਨੇ ਮਾਹਿਰਾਂ ਦੀ ਮਦਦ ਨਾਲ ਟਾਈਪ 1 ਡਾਇਬਟੀਜ਼ ਵਾਲੇ ਵਿਦਿਆਰਥੀਆਂ ਨੂੰ ਦਿੱਤੀ ਜਾਣ ਵਾਲੀ ਸਹਾਇਤਾ ਦੀ ਸਮੀਖਿਆ ਕਰਦਿਆਂ ਫ਼ੈਸਲਾ ਕੀਤਾ ਹੈ ਕਿ ਹੁਣ ਅਜਿਹੇ ਵਿਦਿਆਰਥੀਆਂ ਨੂੰ 10ਵੀਂ ਅਤੇ 12ਵੀਂ ਜਮਾਤ ਦੀਆਂ ਬੋਰਡ ਪ੍ਰੀਖਿਆਵਾਂ ਦੌਰਾਨ ਵਿਸ਼ੇਸ਼ ਸਹੂਲਤਾਂ ਦਿੱਤੀਆਂ ਜਾਣਗੀਆਂ।
ਮਾਹਿਰਾਂ ਅਨੁਸਾਰ ਇਸ ਨਿਯਮ ਦੇ ਲਾਗੂ ਹੋਣ ਨਾਲ ਸ਼ੂਗਰ ਦੇ ਮਰੀਜ਼ ਸ਼ੂਗਰ ਲੈਵਲ ਡਿੱਗਣ ਦੇ ਖਤਰੇ ਤੋਂ ਬਚ ਸਕਣਗੇ ਕਿਉਂਕਿ ਕਈ ਵਾਰ ਤਣਾਅ ਜਾਂ ਬੱਚਿਆਂ ਦੇ ਖਾਣ-ਪੀਣ ਦੇ ਠੀਕ ਨਾ ਹੋਣ ਕਾਰਨ ਸੈਂਟਰ ਵਿੱਚ ਸ਼ੂਗਰ ਲੈਵਲ ਪ੍ਰਭਾਵਿਤ ਹੋ ਜਾਂਦਾ ਹੈ। ਇਸ ਦੇ ਨਾਲ ਹੀ ਸੀ.ਬੀ.ਐਸ.ਈ. ਨੇ ਸਪੱਸ਼ਟ ਕੀਤਾ ਹੈ ਕਿ ਕੋਈ ਵੀ ਵਿਦਿਆਰਥੀ ਪ੍ਰੀਖਿਆ ਹਾਲ ਵਿੱਚ ਕੋਈ ਸੰਚਾਰ ਉਪਕਰਨ ਜਾਂ ਇਤਰਾਜ਼ਯੋਗ ਚੀਜ਼ ਨਹੀਂ ਲੈ ਕੇ ਜਾਵੇਗਾ।
ਇਨ੍ਹਾਂ ਗੱਲਾਂ ਦਾ ਰੱਖਣ ਧਿਆਨ
- ਪ੍ਰੀਖਿਆ ਤੋਂ ਇਕ ਦਿਨ ਪਹਿਲਾਂ ਪ੍ਰੀਖਿਆ ਕੇਂਦਰ ’ਤੇ ਜਾ ਕੇ ਸੁਪਰੀਡੈਂਟ ਨੂੰ ਆਪਣੇ ਨਾਲ ਲਿਜਾਣ ਵਾਲੀਆਂ ਵਸਤੂਆਂ ਬਾਰੇ ਸੂਚਿਤ ਕਰਨਾ ਹੋਵੇਗਾ।
- ਪ੍ਰੀਖਿਆਰਥੀਆਂ ਨੂੰ ਪ੍ਰੀਖਿਆ ਸ਼ੁਰੂ ਹੋਣ ਤੋਂ ਘੱਟੋ-ਘੱਟ 45 ਮਿੰਟ ਪਹਿਲਾਂ ਪ੍ਰੀਖਿਆ ਕੇਂਦਰ ਪੁੱਜਣਾ ਹੋਵੇਗਾ।
- ਡਾਇਬਟਿਕ ਵਿਦਿਆਰਥੀ 9.45 ਵਜੇ ਤੱਕ ਪ੍ਰੀਖਿਆ ਹਾਲ ’ਚ ਬੈਠ ਜਾਣ।
- ਇਸ ਤਰ੍ਹਾਂ ਦੇ ਵਿਦਿਆਰਥੀਆਂ ਦੇ ਮਾਪਿਆਂ ਨੂੰ ਅੰਡਰਟੇਕਿੰਗ ਦੇਣੀ ਹੋਵੇਗੀ ਕਿ ਉਨ੍ਹਾਂ ਦਾ ਬੱਚਾ ਸਿਰਫ ਮੈਡੀਕਲ ਜਾਂ ਲੋੜੀਂਦੀਆਂ ਚੀਜ਼ਾਂ ਹੀ ਸੈਂਟਰ ’ਚ ਲੈ ਕੇ ਜਾਵੇਗਾ।
ਲਿਜਾ ਸਕਦੇ ਹਨ ਇਹ ਸਭ
- ਸ਼ੂਗਰ ਦੀਆਂ ਗੋਲੀਆਂ/ਚਾਕਲੇਟ/ਕੈਂਡੀ
- ਕੇਲਾ/ਸੇਬ/ਸੰਤਰਾਂ ਅਤੇ ਹੋਰ ਫਲ
- ਸਨੈਕਸ ਆਈਟਮ ਵਰਗੇ ਸੈਂਡਵਿਚ ਜਾਂ ਹੋਰ ਕੋਈ ਵੀ ਹਾਈ ਪ੍ਰੋਟੀਨ ਆਹਾਰ
- ਡਾਕਟਰ ਦੇ ਪ੍ਰਿਸੀਕ੍ਰਿਪਸ਼ਨ ਦੇ ਅਨੁਸਾਰ ਦਵਾਈਆਂ
- ਪਾਣੀ ਦੀ ਬੋਤਲ (500 ਐੱਮ. ਐੱਲ.)
- ਗਲੂਕੋਮੀਟਰ ਅਤੇ ਗਲੂਕੋਜ ਟੈਸਟਿੰਗ ਸਟ੍ਰਿਪਸ
- ਗਲੂਕੋਜ ਮਾਨੀਟਰਿੰਗ (ਸੀ. ਜੀ. ਐੱਮ.) ਮਸ਼ੀਨ, ਫਲੈਸ਼ ਗਲੂਕੋਜ ਮਾਨੀਟਰਿੰਗ (ਐੱਫ. ਜੀ. ਐੱਮ.) ਮਸ਼ੀਨ ਜਾਂ ਇੰਸੂਲਿਨ ਪੰਪ