ਚੰਡੀਗੜ੍ਹ: ਹਰਿਆਣਾ ਨੂੰ ਰੇਲਵੇ ਬਜਟ (The Railway Budget) ਦੇ ਤਹਿਤ ਕਈ ਤੋਹਫ਼ੇ ਮਿਲੇ ਹਨ, ਜਿਸ ਦੇ ਤਹਿਤ ਹਰਿਆਣਾ ਰੇਲਵੇ ਲਈ ਬਜਟ ਅਲਾਟਮੈਂਟ ਵਿੱਚ ਵਾਧਾ ਹੋਇਆ ਹੈ। 2024-25 ਵਿੱਤੀ ਸਾਲ ਲਈ ਹਰਿਆਣਾ ਨੂੰ 3383 ਕਰੋੜ ਰੁਪਏ ਮਿਲੇ ਹਨ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ (Chief Minister Naib Singh Saini) ਨੇ ਇਸ ਤੋਹਫ਼ੇ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ (Prime Minister Narendra Modi) ਅਤੇ ਕੇਂਦਰੀ ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ (Union Railway Minister Ashwani Vaishnav) ਦਾ ਧੰਨਵਾਦ ਕੀਤਾ ਹੈ।
ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਸਾਲ 2009-2014 ਦੌਰਾਨ ਹਰਿਆਣਾ ਦਾ ਔਸਤਨ ਰੇਲਵੇ ਬਜਟ 315 ਕਰੋੜ ਰੁਪਏ ਸੀ, ਜਦਕਿ ਸਾਡੀ ਡਬਲ ਇੰਜਣ ਵਾਲੀ ਸਰਕਾਰ ਨੇ ਰੇਲਵੇ ਬਜਟ ਵਿਚ ਲਗਾਤਾਰ ਵਾਧਾ ਕੀਤਾ ਹੈ, ਜਿਸ ਦੇ ਨਤੀਜੇ ਵਜੋਂ ਅੱਜ ਇਹ ਬਜਟ ਵਧ ਕੇ 3383 ਕਰੋੜ ਰੁਪਏ ਹੋ ਗਿਆ ਹੈ। ਇਸ ਤਰ੍ਹਾਂ ਪਿਛਲੀ ਸਰਕਾਰ ਦੇ ਮੁਕਾਬਲੇ ਬਜਟ ਵਿੱਚ 11 ਗੁਣਾ ਵਾਧਾ ਹੋਇਆ ਹੈ।
ਉਨ੍ਹਾਂ ਕਿਹਾ ਕਿ 15875 ਕਰੋੜ ਰੁਪਏ ਦੇ ਰੇਲਵੇ ਪ੍ਰਾਜੈਕਟ ਹਰਿਆਣਾ ਵਿੱਚ ਚੱਲ ਰਹੇ ਹਨ। ਆਰ.ਆਰ.ਟੀ.ਐਸ ਪ੍ਰੋਜੈਕਟ ਵੀ ਤੇਜ਼ੀ ਨਾਲ ਲਾਗੂ ਕੀਤਾ ਜਾ ਰਿਹਾ ਹੈ। ਇੰਨਾ ਹੀ ਨਹੀਂ 1195 ਕਿਲੋਮੀਟਰ ‘ਚ ਨਵੇਂ ਟਰੈਕ ਬਣਾਉਣ ਦੇ ਟੀਚੇ ਨਾਲ ਸੂਬੇ ‘ਚ 14 ਪ੍ਰਾਜੈਕਟ ਚੱਲ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸਾਲ 2014 ਤੋਂ ਪਹਿਲਾਂ ਆਰ.ਓ.ਬੀ. ਅਤੇ ਆਰ.ਯੂ.ਬੀ. ਦੀ ਉਸਾਰੀ ਦਾ ਕੰਮ ਮੱਠੀ ਰਫ਼ਤਾਰ ਨਾਲ ਚੱਲ ਰਿਹਾ ਸੀ ਜਦਕਿ ਸਾਲ 2014 ਤੋਂ ਲੈ ਕੇ ਹੁਣ ਤੱਕ ਸੂਬੇ ਵਿੱਚ 508 ਰੇਲ ਫਲਾਈਓਵਰ ਅਤੇ ਅੰਡਰ ਬ੍ਰਿਜ ਬਣਾਏ ਜਾ ਚੁੱਕੇ ਹਨ।
ਉਨ੍ਹਾਂ ਦੱਸਿਆ ਕਿ ਹਰਿਆਣਾ ਵਿੱਚ 100 ਫੀਸਦੀ ਰੇਲਵੇ ਬਿਜਲੀਕਰਨ ਦਾ ਕੰਮ ਪੂਰਾ ਹੋ ਚੁੱਕਾ ਹੈ। ਇਸ ਤੋਂ ਇਲਾਵਾ ਹਰਿਆਣਾ ਦੇ 34 ਸਟੇਸ਼ਨਾਂ ਨੂੰ ਅੰਮ੍ਰਿਤ ਸਟੇਸ਼ਨਾਂ ਵਜੋਂ ਵਿਕਸਤ ਕੀਤਾ ਜਾਵੇਗਾ। ਇਨ੍ਹਾਂ ਵਿੱਚ ਅੰਬਾਲਾ ਕੈਂਟ, ਅੰਬਾਲਾ ਸਿਟੀ, ਬਹਾਦਰਗੜ੍ਹ, ਬੱਲਭਗੜ੍ਹ, ਭੱਟੂ, ਭਿਵਾਨੀ ਜੰਕਸ਼ਨ, ਚਰਖੀ ਦਾਦਰੀ, ਫਰੀਦਾਬਾਦ, ਫਰੀਦਾਬਾਦ ਨਿਊ ਟਾਊਨ, ਗੋਹਾਨਾ, ਗੁਰੂਗ੍ਰਾਮ, ਹਾਂਸੀ, ਹਿਸਾਰ, ਹੋਡਲ, ਜੀਂਦ ਜੰਕਸ਼ਨ, ਕਾਲਾਂਵਾਲੀ, ਕਾਲਕਾ, ਕਰਨਾਲ, ਕੋਸਲੀ, ਕੁਰੂਕਸ਼ੇਤਰ ਜੰਕਸ਼ਨ, ਲੋਹਾਰੂ, ਮਹਿੰਦਰਗੜ੍ਹ , ਮੰਡੀ ਆਦਮਪੁਰ, ਮੰਡੀ ਡੱਬਵਾਲੀ, ਨਾਰਨੌਂਦ, ਨਰਵਾਣਾ ਜੰਕਸ਼ਨ, ਪਲਵਲ, ਪਾਣੀਪਤ ਜੰਕਸ਼ਨ, ਪਟੌਦੀ ਰੋਡ, ਰੇਵਾੜੀ, ਰੋਹਤਕ, ਸਿਰਸਾ, ਸੋਨੀਪਤ ਅਤੇ ਜਗਾਧਰੀ-ਯਮੁਨਾਨਗਰ ਸ਼ਾਮਲ ਹੈ।