ਲੁਧਿਆਣਾ : ਨਾਜਾਇਜ਼ ਕਾਲੋਨੀਆਂ ਬਣਾਉਣ ਵਾਲਿਆਂ ਖ਼ਿਲਾਫ਼ ਗਲਾਡਾ ਅਤੇ ਪੁਲਿਸ ਦੀ ਕਾਰਵਾਈ ਜਾਰੀ ਹੈ, ਜਿਸ ਤਹਿਤ ਅੱਜ ਚੌਥੇ ਦਿਨ ਵੱਖ-ਵੱਖ ਇਲਾਕਿਆਂ ‘ਚ 9 ਮਾਮਲੇ ਦਰਜ ਕੀਤੇ ਗਏ ਹਨ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਗਲਾਡਾ ਵੱਲੋਂ ਨਾਜਾਇਜ਼ ਕਲੋਨੀਆਂ ਦੇ ਮਾਲਕਾਂ ਖ਼ਿਲਾਫ਼ ਭੇਜੀ ਰਿਪੋਰਟ ਦੀਆਂ ਫਾਈਲਾਂ ਜਾਂਚ ਦੇ ਨਾਂ ’ਤੇ ਕਈ ਮਹੀਨਿਆਂ ਤੋਂ ਥਾਣਿਆਂ ਵਿੱਚ ਪੈਂਡਿੰਗ ਪਈਆਂ ਸਨ, ਜਿਸ ਸਬੰਧੀ ਮਾਮਲਾ ਗਲਾਡਾ ਦੇ ਏ.ਸੀ.ਏ. ਪੁਲਿਸ ਕਮਿਸ਼ਨਰ ਕੁਲਦੀਪ ਚਾਹਲ ਦੇ ਨਿਰਦੇਸ਼ਾਂ ‘ਤੇ ਤੇਜ਼ੀ ਨਾਲ ਕੇਸ ਦਰਜ ਕੀਤੇ ਜਾ ਰਹੇ ਹਨ। ਹੁਣ ਤੱਕ ਕੇਸਾਂ ਦੀ ਗਿਣਤੀ 31 ਤੱਕ ਪਹੁੰਚ ਗਈ ਹੈ, ਜੋ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਵਧਣ ਦੀ ਸੰਭਾਵਨਾ ਹੈ।
ਬੇਨਾਮੀ ਕੇਸਾਂ ਦੇ ਪੈਟਰਨ ਵਿੱਚ ਬਦਲਾਅ ਕੀਤਾ ਗਿਆ ਹੈ, ਹੁਣ ਜ਼ਮੀਨਾਂ ਦੇ ਖਸਰਾ ਨੰਬਰਾਂ ਤੋਂ ਮਾਲਕਾਂ ਦੀ ਪਛਾਣ ਕੀਤੀ ਜਾਵੇਗੀ।
ਗਲਾਡਾ ਦੇ ਅਧਿਕਾਰੀਆਂ ਅਨੁਸਾਰ ਉਨ੍ਹਾਂ ਨਾਜਾਇਜ਼ ਕਲੋਨੀਆਂ ਦੇ ਮਾਲਕਾਂ ਖ਼ਿਲਾਫ਼ ਕੇਸ ਦਰਜ ਕਰਨ ਲਈ ਫਰਦ ਦੇ ਆਧਾਰ ’ਤੇ ਰਿਪੋਰਟ ਭੇਜੀ ਸੀ ਪਰ ਪੁਲਿਸ ਵੱਲੋਂ ਬੇਨਾਮੀ ਕੇਸ ਦਰਜ ਕੀਤੇ ਜਾ ਰਹੇ ਹਨ। ਇਸ ਸਬੰਧੀ ਕੋਈ ਸਿਫ਼ਾਰਸ਼ ਜਾਂ ਸੈਟਿੰਗ ਕਰਨ ਦੀ ਚਰਚਾ ਚੱਲ ਰਹੀ ਹੈ, ਇਹ ਮਾਮਲਾ ਪੁਲਿਸ ਦੇ ਉੱਚ ਅਧਿਕਾਰੀਆਂ ਤੱਕ ਵੀ ਪਹੁੰਚ ਗਿਆ ਹੈ। ਇਸ ਤੋਂ ਬਾਅਦ ਕੇਸ ਦਰਜ ਕਰਨ ਦੇ ਪੈਟਰਨ ਵਿੱਚ ਬਦਲਾਅ ਕੀਤਾ ਗਿਆ ਹੈ, ਜਿਸ ਤਹਿਤ ਅਣਪਛਾਤੇ ਵਿਅਕਤੀ ਦੀ ਬਜਾਏ ਖਸਰਾ ਨੰਬਰ ਦੇ ਮਾਲਕ ਦਾ ਜ਼ਿਕਰ ਕੀਤਾ ਗਿਆ ਹੈ। ਇਸ ਬਾਰੇ ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਕੁਝ ਮਾਮਲਿਆਂ ਵਿੱਚ ਜ਼ਮੀਨ ਦੀ ਸਾਂਝੀ ਮਾਲਕੀ ਕਾਰਨ ਇਹ ਸਮੱਸਿਆ ਪੈਦਾ ਹੋਈ ਹੈ, ਅਜਿਹੇ ਵਿੱਚ ਖਸਰਾ ਨੰਬਰ ਤਸਦੀਕ ਕਰਕੇ ਨਾਜਾਇਜ਼ ਕਲੋਨੀਆਂ ਦੇ ਮਾਲਕਾਂ ਦੇ ਨਾਂ ਕੀਤੇ ਜਾਣਗੇ।
ਇਹ ਤਾਜ਼ਾ FIR ਦਰਜ ਕੀਤੀ ਗਈ ਹੈ।
-ਵਿਸ਼ਾਲ ਜੈਨ, ਸੰਜੀਵ ਕੁਮਾਰ, ਅਮਨ ਭਾਟੀਆ, ਵਰਿੰਦਰਾ, ਲਾਡੀਆਂ ਕਲਾਂ ਸਥਿਤ ਵੈਸ਼ਨਵੀ ਅਸਟੇਟ ਕਲੋਨੀ ਦੇ ਮਾਲਕ।
– ਲਾਡੀਆਂ ਕਲਾਂ ਦੀ ਅਮਰਾ ਰੈਜ਼ੀਡੈਂਸੀ ਕਲੋਨੀ ਦੇ ਮਾਲਕ ਮਨਦੀਪ ਗਰੇਵਾਲ, ਅਵਤਾਰ ਸਿੰਘ ਖ਼ਿਲਾਫ਼ ਕੇਸ ਦਰਜ।
– ਚੂਹੜਪੁਰ ਰੋਡ ‘ਤੇ ਦਰਪਨ ਸਿਟੀ ਨਾਮ ਦੀ ਕਲੋਨੀ ਕੱਟਣ ਵਾਲੇ ਅਜੀਤ ਸਿੰਘ ਖ਼ਿਲਾਫ਼ ਐਫ.ਆਈ.ਆਰ.ਦਰਜ।
– ਚੂਹੜਪੁਰ ਵਿੱਚ ਰਾਮ ਐਨਕਲੇਵ ਦੇ ਮਾਲਕ ਮਨੋਜ ਕੁਮਾਰ ਅਤੇ ਮੇਹਰ ਚੰਦ ਖ਼ਿਲਾਫ਼ ਕੇਸ ਦਰਜ।
-ਪਿੰਡ ਭੋਲਾਪੁਰ ਵਿੱਚ ਝਾਬੇਵਾਲ ਐਨਕਲੇਵ ਕਲੋਨੀ ਦੇ ਮਾਲਕਾਂ ਜਗਦੀਸ਼ ਕੁਮਾਰ, ਨਰਿੰਦਰ ਕੁਮਾਰ ਖ਼ਿਲਾਫ਼ ਐਫ.ਆਈ.ਆਰ ਦਰਜ।
– ਪਿੰਡ ਮੇਹਰਬਾਨ ਵਿੱਚ ਸ਼ਰਧਾ ਇੰਡਸਟਰੀਅਲ ਕੰਪਲੈਕਸ ਬਣਾਉਣ ਵਾਲੇ ਸੰਦੀਪ ਕੁਮਾਰ, ਰਮੇਸ਼ ਕੁਮਾਰ ਨੂੰ ਨਾਮਜ਼ਦ ਕੀਤਾ ਗਿਆ ਹੈ।
– ਡੇਹਲੋਂ ਪੁਲਿਸ ਨੇ ਡੇਹਲੋਂ ‘ਚ 2 ਅਤੇ ਸਰੀਂਹ ‘ਚ ਇਕ ਕਾਲੋਨੀਆਂ ਕੱਟਣ ‘ਤੇ 3 ਕੇਸ ਦਰਜ ਕੀਤੇ ਹਨ।