ਹਾਜੀਪੁਰ : ਥਾਣਾ ਹਾਜੀਪੁਰ (Hajipur Police Station) ਅਧੀਨ ਪੈਂਦੇ ਪਿੰਡ ਸਿਪਰੀਆਂ ਦੇ ਗਊ ਘਾਟ ਨੇੜੇ ਕੰਢੀ ਨਹਿਰ ‘ਚ ਡੁੱਬਣ ਕਾਰਨ ਇਕ ਨੌਜਵਾਨ ਦੀ ਮੌਤ ਹੋ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਰੋਹਿਤ ਰਾਣਾ ਪੁੱਤਰ ਗੰਧਰਵ ਸਿੰਘ ਵਾਸੀ ਕਿਆਰੀ ਮੁਹੱਲਾ ਬਡਲਾ ਥਾਣਾ ਦਸੂਹਾ ਆਪਣੇ ਦੋਸਤਾਂ ਨਾਲ ਹੋਲੀ ਖੇਡਦਾ ਹੋਇਆ ਕੰਢੀ ਨਹਿਰ ‘ਤੇ ਪੈਂਦੇ ਪਿੰਡ ਸਿਪਰੀਆਂ ਦੇ ਗਊ ਘਾਟ ਕੋਲ ਨਹਾਉਣ ਲੱਗਾ ਤਾਂ ਰੋਹਿਤ ਰਾਣਾ ਕੰਢੀ ਨਹਿਰ ‘ਚ ਡੁੱਬ ਗਿਆ। ਉਸ ਨੂੰ ਤੁਰੰਤ ਨਹਿਰ ‘ਚੋਂ ਕੱਢ ਕੇ ਹਾਜੀਪੁਰ ਦੇ ਸਰਕਾਰੀ ਹਸਪਤਾਲ ਲਿਜਾਇਆ ਗਿਆ। ਇੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਐਸ.ਐਚ.ਓ ਹਾਜੀਪੁਰ ਪੰਕਜ ਕੁਮਾਰ ਨੇ ਦੱਸਿਆ ਕਿ ਸੂਚਨਾ ਮਿਲਣ ਦੇ ਬਾਅਦ ਹਾਜੀਪੁਰ ਪੁਲਿਸ ਨੇ ਲਾਸ਼ ਨੂੰ ਕਬਜ਼ੇ ‘ਚ ਲੈ ਕੇ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।