ਮੁੰਬਈ : ਗਾਇਕ ਅਤੇ ਰਿਐਲਿਟੀ ਸ਼ੋਅਜ਼ ‘ਚ ਨਜ਼ਰ ਆ ਚੁੱਕੇ ਰਾਹੁਲ ਵੈਦਿਆ (Rahul Vaidya) ਇਸ ਸਮੇਂ ਆਪਣੇ ਸਿਖਰ ‘ਤੇ ਹਨ। ਰਾਹੁਲ ਨੇ ਹਾਲ ਹੀ ‘ਚ ਮੁੰਬਈ ‘ਚ 9 ਕਰੋੜ ਰੁਪਏ ਦਾ ਅਪਾਰਟਮੈਂਟ ਖਰੀਦਿਆ ਹੈ। ਇਹ ਖੁਲਾਸਾ ਸਕੁਏਅਰ ਯਾਰਡਜ਼ ਦੀ ਰਿਪੋਰਟ ਵਿੱਚ ਹੋਇਆ ਹੈ। ਨਵਾਂ ਖਰੀਦਿਆ ਅਪਾਰਟਮੈਂਟ ਬਾਂਦਰਾ ਵੈਸਟ ਵਿੱਚ ਡੀ.ਐਲ.ਐਚ ਗਰੁੱਪ ਦਾ ਇੱਕ ਪ੍ਰੀਮੀਅਮ ਪ੍ਰੋਜੈਕਟ ਹੈ ਜੋ ਡੀ.ਐਲ.ਐਚ ਸਿਗਨੇਚਰ ਵਿੱਚ ਸਥਿਤ ਹੈ। 1.25 ਏਕੜ ਵਿੱਚ ਫੈਲੇ ਇਸ ਕੰਪਲੈਕਸ ਵਿੱਚ ਕਈ ਤਰ੍ਹਾਂ ਦੀਆਂ ਸਹੂਲਤਾਂ ਹਨ।
ਸਕੁਏਅਰ ਯਾਰਡਸ ਦੇ ਅਨੁਸਾਰ, ਰਾਹੁਲ ਵੈਦਿਆ ਨੇ ਜੋ ਅਪਾਰਟਮੈਂਟ ਖਰੀਦਿਆ ਹੈ, ਉਹ ਲਗਭਗ 3,110 ਵਰਗ ਫੁੱਟ (288.92 ਵਰਗ ਮੀਟਰ) ਦੇ ਕਾਰਪੇਟ ਖੇਤਰ ਅਤੇ 317.93 ਵਰਗ ਮੀਟਰ (3,422 ਵਰਗ ਫੁੱਟ) ਦੇ ਬਿਲਟ-ਅੱਪ ਖੇਤਰ ਵਿੱਚ ਫੈਲਿਆ ਹੋਇਆ ਹੈ। ਅਕਤੂਬਰ 2024 ਵਿੱਚ ਅੰਤਿਮ ਰੂਪ ਦਿੱਤੇ ਗਏ ਲੈਣ-ਦੇਣ ਵਿੱਚ 56.37 ਲੱਖ ਰੁਪਏ ਦੀ ਸਟੈਂਪ ਡਿਊਟੀ ਅਤੇ 30,000 ਰੁਪਏ ਦੀ ਰਜਿਸਟ੍ਰੇਸ਼ਨ ਫੀਸ ਸ਼ਾਮਲ ਹੈ।
ਰਾਹੁਲ ਵੈਦਿਆ ਨੇ ਅਗਸਤ ਮਹੀਨੇ ‘ਚ ਕਰੀਬ 2 ਕਰੋੜ ਰੁਪਏ ਦੀ ਰੇਂਜ ਰੋਵਰ ਕਾਰ ਖਰੀਦੀ ਸੀ ਇਸ ਤੋਂ ਇਲਾਵਾ ਉਨ੍ਹਾਂ ਕੋਲ ਔਡੀ ਅਤੇ ਮਰਸਡੀਜ਼ ਵਰਗੀਆਂ ਕਾਰਾਂ ਦਾ ਕਲੈਕਸ਼ਨ ਵੀ ਹੈ। ਹੁਣ ਉਨ੍ਹਾਂ ਨੇ 9 ਕਰੋੜ ਰੁਪਏ ਦਾ ਘਰ ਖਰੀਦਿਆ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਪ੍ਰਸ਼ੰਸਕ ਕਾਫੀ ਖੁਸ਼ ਹਨ।
ਰਾਹੁਲ ਵੈਦਿਆ ‘ਇੰਡੀਅਨ ਆਈਡਲ ਸੀਜ਼ਨ 1’ ਦੇ ਰਨਰ-ਅੱਪ ਸੀ। ਉਨ੍ਹਾਂ ਨੇ ‘ਬਿੱਗ ਬੌਸ 14’ ਵੀ ਕੀਤਾ ਸੀ ਅਤੇ ਉਸ ‘ਚ ਵੀ ਉਹ ਰਨਰ-ਅੱਪ ਰਹੇ ਸੀ। ਇਸ ਤੋਂ ਇਲਾਵਾ ਉਹ ਹਾਲ ਹੀ ‘ਚ ‘ਲਾਫਟਰ ਸ਼ੈਫ’ ‘ਚ ਨਜ਼ਰ ਆਏ ਸੀ। ਜਿੱਥੇ ਉਨ੍ਹਾਂ ਦੀ ਜੋੜੀ ਅਲੀ ਗੋਨੀ ਨਾਲ ਬਣੀ ਸੀ।