ਪੰਜਾਬ : ਜਲੰਧਰ ਦੇ ਬੀ.ਐੱਸ.ਐੱਫ ਚੌਕ ‘ਚ ਸਥਿਤ ਇਕ ਟਰੈਵਲ ਏਜੰਟ ਵੱਲੋਂ ਇਕ ਗਾਹਕ ਨੂੰ ਜਾਅਲੀ ਵੀਜ਼ਾ ਦੇਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਏਜੰਟ ਨੇ ਗਾਹਕ ਤੋਂ 22 ਲੱਖ ਰੁਪਏ ਲੈ ਲਏ। ਇਸ ਘਟਨਾ ਦਾ ਪਤਾ ਲੱਗਣ ‘ਤੇ ਪੀੜਤਾ ਨੇ ਪੁਲਿਸ ਨੂੰ ਸ਼ਿਕਾਇਤ ਕੀਤੀ, ਜਿਸ ਤੋਂ ਬਾਅਦ ਥਾਣਾ ਨਵੀਨ ਬਾਰਾਦਰੀ ‘ਚ ਡਿਫੈਂਸ ਕਾਲੋਨੀ ਦੇ ਰਹਿਣ ਵਾਲੇ ਟਰੈਵਲ ਏਜੰਟ ਮੋਹਨ ਖ਼ਿਲਾਫ਼ ਧੋਖਾਦੇਹੀ ਦਾ ਮਾਮਲਾ ਦਰਜ ਕੀਤਾ ਗਿਆ।
ਪੀੜਤ ਵਿਅਕਤੀ ਗੁਰੂ ਅਮਰਦਾਸ ਨਗਰ ਦਾ ਵਸਨੀਕ ਹੈ, ਜਿਸ ਨੇ ਦੱਸਿਆ ਕਿ ਉਸ ਦੀ ਕਿਸੇ ਰਾਹੀਂ ਟਰੈਵਲ ਏਜੰਟ ਨਾਲ ਮੁਲਾਕਾਤ ਹੋਈ ਸੀ। ਏਜੰਟ ਨੇ ਉਸ ਨੂੰ ਕੈਨੇਡਾ ਦਾ ਵੀਜ਼ਾ ਦਿਵਾਉਣ ਦਾ ਭਰੋਸਾ ਦਿੱਤਾ ਸੀ। ਪੀੜਤ ਨੇ ਉਸ ਨੂੰ 22 ਲੱਖ ਰੁਪਏ ਦਿੱਤੇ, ਪਰ ਵੀਜ਼ਾ ਨਾ ਆਉਣ ‘ਤੇ ਜਦੋਂ ਪੀੜਤ ਨੇ ਉਸ ‘ਤੇ ਦਬਾਅ ਪਾਇਆ ਤਾਂ ਦੋਸ਼ੀ ਨੇ ਕਿਹਾ ਕਿ ਉਸ ਦਾ ਵੀਜ਼ਾ ਆ ਗਿਆ ਹੈ।
ਜਦੋਂ ਪੀੜਤ ਨੂੰ ਵੀਜ਼ਾ ਦਿੱਤਾ ਗਿਆ ਅਤੇ ਉਸ ਦੀ ਜਾਂਚ ਕੀਤੀ ਗਈ ਤਾਂ ਪਤਾ ਲੱਗਾ ਕਿ ਵੀਜ਼ਾ ਜਾਅਲੀ ਸੀ। ਜਦੋਂ ਪੀੜਤ ਨੇ ਇਸ ਮਾਮਲੇ ਬਾਰੇ ਏਜੰਟ ਨਾਲ ਗੱਲ ਕੀਤੀ ਤਾਂ ਉਸ ਨੇ ਗੱਲ ਨੂੰ ਤੋੜ ਮਰੋੜਨਾ ਸ਼ੁਰੂ ਕਰ ਦਿੱਤਾ। ਇਸ ਤੋਂ ਬਾਅਦ ਏਜੰਟ ਵੱਲੋਂ ਪੀੜਤ ਨੂੰ ਨਾ ਤਾਂ ਪੈਸੇ ਵਾਪਸ ਕੀਤੇ ਗਏ ਅਤੇ ਨਾ ਹੀ ਵੀਜ਼ਾ ਦਿੱਤਾ ਗਿਆ। ਸਬੰਧਤ ਪੁਲਿਸ ਨੂੰ ਸ਼ਿਕਾਇਤ ਦੇਣ ਮਗਰੋਂ ਪੁਲਿਸ ਨੇ ਏਜੰਟ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਹੈ। ਫਿਲਹਾਲ ਦੋਸ਼ੀ ਦੀ ਗ੍ਰਿਫਤਾਰੀ ਨਹੀਂ ਹੋਈ ਹੈ।