ਮੁੰਬਈ: ਅਜੇ ਦੇਵਗਨ (Ajay Devgn) ਨੇ ਅੱਜ ਆਪਣੀ ਆਉਣ ਵਾਲੀ ਫਿਲਮ ‘ਮੈਦਾਨ’ ਦਾ ਨਵਾਂ ਪੋਸਟਰ ਰਿਲੀਜ਼ ਕੀਤਾ ਹੈ। ਉਨ੍ਹਾਂ ਨੇ ਕੈਪਸ਼ਨ ਲਿਖਿਆ – ਇੱਕ ਵਿਅਕਤੀ, ਇੱਕ ਟੀਮ, ਇੱਕ ਰਾਸ਼ਟਰ ਅਤੇ ਇੱਕ ਅਟੁੱਟ ਵਿਸ਼ਵਾਸ ਦੀ ਅਸਾਧਾਰਣ ਕਹਾਣੀ ਦੇ ਗਵਾਹ ਬਣੋ ਜਿਸਨੇ ਫੁੱਟਬਾਲ ਦੇ ਇਤਿਹਾਸ ‘ਤੇ ਇਕ ਅਮਿੱਟ ਛਾਪ ਛੱਡੀ ਹੈ! ਇਸ ਤੋਂ ਇਲਾਵਾ, ਅਜੇ ਦੇਵਗਨ ਨੇ ਫਿਲਮ ਦੇ ਟ੍ਰੇਲਰ ਦੀ ਰਿਲੀਜ਼ ਮਿਤੀ – 7 ਮਾਰਚ ਦਾ ਵੀ ਖ਼ੁਲਾਸਾ ਕੀਤਾ ਹੈ। ‘ਮੈਦਾਨ’ ਈਦ ਦੇ ਮੌਕੇ ‘ਤੇ ਸਿਨੇਮਾਘਰਾਂ ‘ਚ ਦਸਤਕ ਦੇਵੇਗੀ।
ਫੁੱਟਬਾਲ ਕੋਚ ‘ਤੇ ਆਧਾਰਿਤ ਹੋਵੇਗੀ ਇਹ ਫਿਲਮ
ਫਿਲਮ ‘ਚ ਅਜੇ ਦੇਵਗਨ ਫੁੱਟਬਾਲ ਕੋਚ ਸਈਅਦ ਅਬਦੁਲ ਰਹਿਮਾਨ ਦੀ ਭੂਮਿਕਾ ‘ਚ ਨਜ਼ਰ ਆਉਣਗੇ, ਜਿਨ੍ਹਾਂ ਨੂੰ ਭਾਰਤੀ ਫੁੱਟਬਾਲ ਦਾ ਮੋਢੀ ਮੰਨਿਆ ਜਾਂਦਾ ਹੈ। ਸਈਅਦ ਅਬਦੁਲ ਰਹਿਮਾਨ ਨੇ 1950 ਤੋਂ 1963 ਤੱਕ ਭਾਰਤੀ ਫੁੱਟਬਾਲ ਟੀਮ ਦੇ ਕੋਚ ਅਤੇ ਮੈਨੇਜਰ ਵਜੋਂ ਸੇਵਾ ਨਿਭਾਈ ਸੀ। ‘ਮੈਦਾਨ’ ‘ਚ ਅਜੇ ਦੇਵਗਨ ਤੋਂ ਇਲਾਵਾ ਪ੍ਰਿਆਮਣੀ ਅਤੇ ਗਜਰਾਜ ਰਾਓ ਵਰਗੇ ਕਲਾਕਾਰ ਵੀ ਅਹਿਮ ਭੂਮਿਕਾਵਾਂ ‘ਚ ਨਜ਼ਰ ਆਉਣਗੇ। ਇਹ ਫਿਲਮ ਬੋਨੀ ਕਪੂਰ ਅਤੇ ਜ਼ੀ ਸਟੂਡੀਓ ਦੇ ਬੈਨਰ ਹੇਠ ਰਿਲੀਜ਼ ਹੋਵੇਗੀ।
ਯੂਜ਼ਰਸ ਨੇ ਵੀ ‘ਮੈਦਾਨ’ ਦੇ ਪੋਸਟਰ ਨੂੰ ਕੀਤਾ ਹੈ ਪਸੰਦ
ਫਿਲਮ ਦਾ ਪੋਸਟਰ ਆਊਟ ਹੁੰਦੇ ਹੀ ਯੂਜ਼ਰਸ ਨੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਜਿੱਥੇ ਇਕ ਯੂਜ਼ਰ ਨੇ ਲਿਿਖਆ- ‘ਮੈਦਾਨ’ ਬਲਾਕਬਸਟਰ ਫਿਲਮ ਸਾਬਤ ਹੋਵੇਗੀ। ਜਦਕਿ ਇਕ ਹੋਰ ਯੂਜ਼ਰ ਨੇ ਲਿਖਿਆ – ਅਜੇ ਦੇਵਗਨ ਮੇਰਾ ਪਸੰਦੀਦਾ ਐਕਟਰ ਹੈ। ਉਨ੍ਹਾਂ ਦੀ ਇਹ ਫਿਲਮ ਸੁਪਰਹਿੱਟ ਹੋਵੇਗੀ।
ਲੰਬੇ ਸਮੇਂ ਤੋਂ ਰੁਕੀ ਹੋਈ ਸੀ ਫਿਲਮ
ਰਿਪੋਰਟਾਂ ਦੀ ਮੰਨੀਏ ਤਾਂ ‘ਮੈਦਾਨ’ ਦਾ ਐਲਾਨ 2018 ‘ਚ ਕੀਤਾ ਗਿਆ ਸੀ।2019 ਵਿੱਚ ਇਹ ਫਿਲਮ ਦੀ ਰਿਲੀਜ਼ ਹੋਣ ਦੀ ਉਮੀਦ ਸੀ, ਪਰ ਅਜਿਹਾ ਨਹੀਂ ਹੋਇਆ। ਮੇਕਰਸ ਫਿਰ ‘ਮੈਦਾਨ’ ਨੂੰ 2023 ‘ਚ ਰਿਲੀਜ਼ ਕਰਨਾ ਚਾਹੁੰਦੇ ਸਨ। ਹਾਲਾਂਕਿ ਪਿਛਲੇ ਸਾਲ ‘ਟਾਈਗਰ 3’, ‘ਐਨੀਮਲ’, ‘ਡੰਕੀ’ ਵਰਗੀਆਂ ਰਿਲੀਜ਼ਾਂ ਕਾਰਨ ਇਕ ਵਾਰ ਫਿਰ ਇਸ ਫਿਲਮ ਦੀ ਰਿਲੀਜ਼ ਡੇਟ ਟਾਲ ਦਿੱਤੀ ਗਈ ਸੀ। ਹੁਣ ਆਖਿਰਕਾਰ ‘ਮੈਦਾਨ’ ਈਦ ਦੇ ਮੌਕੇ ‘ਤੇ ਰਿਲੀਜ਼ ਹੋਵੇਗੀ।
‘ਸ਼ੈਤਾਨ’ ‘ਚ ਵੀ ਨਜ਼ਰ ਆਉਣਗੇ ਅਜੇ
ਅਜੇ ਦੇਵਗਨ ਜਲਦ ਹੀ ‘ਸ਼ੈਤਾਨ’ ‘ਚ ਵੀ ਨਜ਼ਰ ਆਉਣਗੇ। ‘ਸ਼ੈਤਾਨ’ ਪਿਛਲੇ ਸਾਲ ਰਿਲੀਜ਼ ਹੋਈ ਗੁਜਰਾਤੀ ਫਿਲਮ ‘ਵਸ਼’ ਦਾ ਰੀਮੇਕ ਹੈ। ਫਿਲਮ ਦੀ ਕਹਾਣੀ ਕਾਲਾ ਜਾਦੂ ਅਤੇ ਵਸ਼ੀਕਰਨ ‘ਤੇ ਆਧਾਰਿਤ ਹੈ। ਜਿੱਥੇ ਮਾਧਵਨ ‘ਸ਼ੈਤਾਨ’ ਦੇ ਰੂਪ ‘ਚ ਨਜ਼ਰ ਆਉਣਗੇ। ਅਜੇ ਦੇਵਗਨ ਆਪਣੇ ਪਰਿਵਾਰ ਨੂੰ ਕਾਲੇ ਜਾਦੂ ਤੋਂ ਬਚਾਉਂਦੇ ਹੋਏ ਨਜ਼ਰ ਆਉਣਗੇ।ਇਸ ਅਲੌਕਿਕ ਡਰਾਉਣੀ-ਥ੍ਰਿਲਰ ਫਿਲਮ ‘ਚ ਅਜੇ ਦੇਵਗਨ ਤੋਂ ਇਲਾਵਾ ਆਰ ਮਾਧਵਨ, ਦੱਖਣੀ ਅਦਾਕਾਰਾ ਜੋਤਿਕਾ ਅਤੇ ਜਾਨਕੀ ਬੋਦੀਵਾਲਾ ਨਜ਼ਰ ਆਉਣਗੇ। ਵਿਕਾਸ ਬਹਿਲ ਦੇ ਨਿਰਦੇਸ਼ਨ ਹੇਠ ਬਣੀ ਇਹ ਫਿਲਮ 8 ਮਾਰਚ ਨੂੰ ਰਿਲੀਜ਼ ਹੋਵੇਗੀ।